SANTI MEIJIDE - CONCERTO DE NADAL (SO PIANO)

A Sala Ártika celebra o Nadal cun concerto especial a cargo do pianista vigués Santiago Meijide, intérprete formado na Escola Superior de Música de Cataluña, na Academia Gnessin de Moscova e no Centro Superior Katarina Gurska de Madrid. O programa propón unha viaxe polas grandes transformacións da linguaxe pianística entre os séculos XVIII e XIX. A expresividade da Sonata en fa sostido menor de Carl Philipp Emanuel Bach abre un percorrido que continúa coa brillantez e elegancia da Sonata nº 25 op. 79 de Beethoven. A continuación, a Fantasía en fa menor op. 49 de Chopin desprega unha das páxinas máis ambiciosas do compositor, na que conviven lirismo, dramatismo e unha fonda imaxinación poética. O concerto culmina cos Estudos sinfónicos op. 13 de Robert Schumann, unha das grandes obras do repertorio romántico para piano, onde a esixencia técnica se pon ao servizo dunha profunda riqueza expresiva. Un recital pensado para gozar da música en directo nunha data especial, cun programa de grande beleza e intensidade interpretativa.